ദേശീയ പട്ടികജാതി ധനകാര്യ വികസന കോർപ്പറേഷന്റെ വായ്പ പദ്ധതികൾ എന്തൊക്കെയാണ് ?

ദേശീയ പട്ടികജാതി ധനകാര്യ വികസന കോർപ്പറേഷന്റെ (എൻ.എസ്.എഫ്. ഡി.സി.) പുനർ വായ്പാ സഹായത്തോടു കൂടി പട്ടികജാതിക്കാർക്കു മാത്രമായി നടപ്പിലാക്കുന്ന പദ്ധതികളാണിവ.

• കൃഷിഭൂമി വായ്പാ പദ്ധതി പട്ടികജാതിയിൽപ്പെട്ട ഭൂരഹിത കർഷകത്തൊഴിലാളികളെ ഭൂവുടമകളാക്കുക എന്ന മഹത്തായ ലക്ഷ്യം മുൻ നിർത്തി നടപ്പിലാക്കുന്ന പുതിയ “കൃഷിഭൂമി വായ്പാ പദ്ധതി” കഴിഞ്ഞ സാമ്പത്തിക വർഷം ആരംഭിച്ചു കഴിഞ്ഞു. കുറഞ്ഞത് 30 സെന്റ് കൃഷിഭൂമി വാങ്ങുന്നതിനായി പരമാവധി 5.00 ലക്ഷം രൂപ വരെ (50,000/- രൂപ സബ്സിഡി ഉൾപ്പെടെ) നൽകുന്നതാണ് ഇൗ പദ്ധതി. വായ്പയുടെ പലിശ നിരക്ക് 6% വും തിരിച്ചടവ് കാലാവധി 8 വർഷവുമാണ്.

• മൈക്രോ ക്രെഡിറ്റ് ഫൈനാൻസ് പദ്ധതി പട്ടികജാതിയിൽപ്പെട്ടവരും സാമ്പത്തികമായി ഏറ്റവും പിന്നോക്കാവസ്ഥയിലുള്ളവരുമായ ലഘു സംരംഭകർക്ക് ഏറ്റവും ചുരുങ്ങിയ മുതൽ മുടക്ക് ആവശ്യമുള്ള മേഖലകളിൽ സ്വന്തമായി സ്വയം തൊഴിൽ സംരംഭങ്ങൾ ആരംഭിക്കുന്നതിനുള്ള പദ്ധതിയാണിത്. പരമ്പരാഗത തൊഴിൽ മേഖലകൾക്ക് പ്രാമുഖ്യം നൽകുന്നതാണ്. പരമാവധി 60,000/- രൂപ വരെയാണ് ഇൗ പദ്ധതിയിൻ കീഴിൽ വായ്പ നൽകുന്നത്. വായ്പയുടെ പലിശ നിരക്ക് 5% വും തിരിച്ചടവ് കാലാവധി 3 വർഷവുമാണ്.

• ലഘു വ്യവസായ യോജന പട്ടികജാതിയിൽപ്പെട്ട സംരംഭകത്വ ഗുണമുള്ളവർക്ക് അവരുടെ അഭിരുചിക്കും തൊഴിൽപരമായ വൈദഗ്ദ്ധ്യത്തിനുമനുസരിച്ച് വായ്പ നൽകുന്ന പദ്ധതിയാണിത്. ഇതിൻപ്രകാരം വ്യക്തിഗത സംരംഭങ്ങൾക്ക് അവർക്ക് ആവശ്യമായ മേഖലകളിൽ മുതൽ മുടക്കാൻ പദ്ധതിയുടെ വിജയ സാധ്യത അനുസരിച്ച് വായ്പ നൽകുന്നതായിരിക്കും. പരമാവധി പദ്ധതി തുക 4.00 ലക്ഷം രൂപയാണ്. വായ്പയുടെ പലിശ നിരക്ക് 6% വും തിരിച്ചടവ് കാലാവധി 5 വർഷവുമാണ്.

• മഹിളാ സമൃദ്ധി യോജന പട്ടികജാതി വിഭാഗത്തിൽപ്പെട്ട സ്ത്രീകളുടെ ഉന്നമനം ലക്ഷ്യമാക്കിക്കൊണ്ട് ആവിഷ്ക്കരിച്ചിട്ടുള്ള ഇൗ പദ്ധതിയിൻ കീഴിൽ പരമാവധി 60,000/- രൂപ വായ്പ നൽകാവുന്നതാണ്. സ്ത്രീ സംരംഭകർക്ക് അനുയോജ്യമായതും എന്നാൽ കുറഞ്ഞ മുതൽ മുടക്ക് മാത്രം വേണ്ടി വരുന്നതുമായ ഏതെങ്കിലും തൊഴിലിൽ ഏർപ്പെട്ട് ഉപജീവന മാർഗ്ഗം കണ്ടെത്തുന്നതിനും അതുവഴി അവരുടെ സാമൂഹിക സാമ്പത്തിക സ്ഥിതി മെച്ചപ്പെടുത്തുന്നതിനും ഉദ്ദേശിച്ചുകൊണ്ടുള്ള ഇൗ പദ്ധതിയുടെ പലിശ നിരക്ക് 4% വും തിരിച്ചടവ് കാലാവധി 3 വർഷവുമാണ്.

• സ്ത്രീ ശാക്തീകരണ പരിപാടി (കുടുംബശ്രീ)സാമൂഹിക ശാക്തീകരണത്തിലൂടെ ഗ്രാമീണ സ്ത്രീകളുടെ ശാക്തീകരണം എന്ന ആശയം യാഥാർത്ഥ്യമാക്കാനുള്ള കോർപ്പറേഷന്റെ പുതിയ സംരംഭമാണ് സ്ത്രീ ശാക്തീകരണ പരിപാടി. പാവപ്പെട്ടവരെയും പാർശ്വവത്കരിക്കപ്പെട്ടവരെയും മൈക്രോ ഫിനാൻസ് വഴി പുനരധിവസിപ്പിക്കാനുള്ള അന്തർലീനമായ കഴിവ് ആസൂത്രകരിൽ നിന്നും പോളിസി മേക്കർമാരിൽ നിന്നും വ്യാപകമായ പ്രശംസ നേടിയ സംസ്ഥാന സർക്കാരിന്റെ കുടുംബശ്രീ പ്രസ്ഥാനവുമായി സഹകരിച്ചാണ് പ്രോഗ്രാം നടപ്പിലാക്കുന്നത്. പദ്ധതി പ്രകാരം, പട്ടികജാതി വിഭാഗത്തിൽപ്പെട്ട ഒരു കൂട്ടം വനിതാ സംരംഭകർക്ക് വരുമാനമുണ്ടാക്കുന്ന പ്രവർത്തനങ്ങൾ നടത്താൻ കോർപ്പറേഷൻ വായ്പ നൽകുന്നു. കുടുംബശ്രീയുടെ അയൽപക്ക ഗ്രൂപ്പുകളുടെ മാതൃകയിൽ ഗ്രൂപ്പിൽ 5 മുതൽ 20 വരെ അംഗങ്ങൾ ഉൾപ്പെട്ടേക്കാം. പദ്ധതിയുടെ പരമാവധി പദ്ധതിച്ചെലവ് ഒരു അംഗത്തിന് 60,000 രൂപ പ്രകാരം ഗ്രൂപ്പിന് ആകെ 50000 രൂപ ആണ്. വായ്പയുടെ പലിശ 5% p.a ആയിരിക്കും. തിരിച്ചടവ് കാലയളവ് 3 വർഷം

• ഇ-ഓട്ടോ സംസ്ഥാന സർക്കാരിന്റെ പരിസ്ഥിതി സൗഹൃദ വികസന പരിപാടികളുടെ ഭാഗമായി കോർപ്പറേഷൻ പട്ടികജാതി വിഭാഗത്തിൽപ്പെട്ട ഗുണഭോക്താക്കൾക്ക് പുതിയ ഒരു വാഹന വായ്പാ പദ്ധതി ആരംഭിച്ചിട്ടുണ്ട്. സാധാരണ ഒാട്ടോറിക്ഷയെ അപേക്ഷിച്ച് കൂടുതൽ ഇന്ധനക്ഷമത ഉള്ളതും പരിസ്ഥിതി സൗഹൃദവുമായ “ഇ-ഒാട്ടോ” കേരള സർക്കാർ സ്ഥാപനമായ കേരള ഒാട്ടോമൊബൈൽസ് ലിമിറ്റഡ് (കെ.എ.എൽ) ൽ നിന്നും വാങ്ങുന്നതിന് കോർപ്പറേഷൻ വായ്പ നൽകുന്ന പദ്ധതിയാണിത്. പദ്ധതിയുടെ പരമാവധി തുക 3,09,700/- രൂപയാണ്. വായ്പയുടെ പലിശ നിരക്ക് 6% വും തിരിച്ചടവ് കാലാവധി 5 വർഷവുമാണ്.

മുകളിൽപ്പറഞ്ഞ (എൻ.എസ്.എഫ്.ഡി.സി.) പദ്ധതികളിൽ എല്ലാം തന്നെ അപേക്ഷകരുടെ കുടുംബ വാർഷിക വരുമാന പരിധി 3,00,000/- രൂപയാണ്. മേൽപ്പറഞ്ഞ എൻ.എസ്.എഫ്.ഡി.സി. പദ്ധതികളിൽ (കൃഷിഭൂമി വായ്പ ഒഴികെ) പരമാവധി 10,000/- രൂപ വരെ അർഹരായ ഗുണഭോക്താക്കൾക്ക് സർക്കാരിൽ നിന്നും ഫണ്ട് ലഭിക്കുന്ന പക്ഷം സബ്സിഡി നൽകുന്നതാണ്.